Mga Paraan Para Maiwasan Ang Pag-aaway Niyong Mag-asawa!

Imposible na ang dalawang taong magkarelasyon ay hindi nag-aaway. Dahil sa pagkakaiba-iba ng kinalakihan, paniniwala, at opinyon, natural lang na minsan ay hindi magkaunawaan.

Pero kung ang bangayan niyo ay nakakaapekto na sa inyong relasyon, mga anak at pamilya, maaaring mauwi ito sa hiwalayan. Kung ayaw mong mangyari ito, mayroon pang pag-asa upang maisalba ang inyong relasyon. 

Narito ang ilang mga tips upang maiwasan ang pag-aaway ninyong mag-asawa o mag-syota:

1. Mag-usap ng maayos

Komunikasyon ang isa sa mga importanteng pundasyon ng isang masayang relasyon. Kaya kung mayroon kayong problema, makakabuti na pag-usapan niyo muna ito ng masinsinan bago manisi kung sino ba ang may kasalanan. Iwasan din ang pagsisigawan dahil mas ma-iistress lamang kayong pareho. 

2. Matutong makinig

Ang masayang relasyon ay ang pagkakaroon ng mabuting pakikinig at pag-unawa. Imbes na kontrahin agad ang sinasabi ng iyong asawa matuto ka munang makinig sa kanyang sasabihin. 

3. Matutong magpasensya

Kung gusto mong tumagal ang inyong relasyon, dapat ay matuto kang habaan ang iyong pasensya. Dahil tao lamang kayong pareho, nagkakamali din kayo minsan. May mga maliliit na bagay gaya ng pagkalimot ng inyong anniversary o hindi agad nakapag-reply sa text ang pinagmumulan ng away, matutong magpalampas ng mga maliit na pagkakamali. 

4. Iwasan ang pagtataas ng boses

Minsan kung ikaw ay talaga namang napuno na at sobrang galit na ay mahirap kontrolin ang pagtaas ng boses. Ngunit ang pagsisigawan habang nag-aaway ay walang naidudulot na mabuti sa inyong dalawa. Maaaring makaapekto pa ito sa ibang taong nasa paligid niyo gaya ng inyong mga anak. 

5. Aminin ang nagawang pagkakamali

Ang pag-amin ng iyong pagkakamali ay hindi makakaliit sa iyong pagkatao. Kung alam mong may nagawa kang kasalanan maliit man yan o malaki, matuto kang humingi ng tawad at aminin ang iyong mali. Hindi makakatulong ang pagtakpan ang sarili dahil magdudulot lang it lalo ng "trust issues."

6. Matutong magpatawad

Kung ang iyong partner ay humihingi ng tawad at nagsisisi siya sa nagawang pagkakamali, matuto ka ring magpatawad upang hindi na lalo pang lumaki ang gulo. Kung hindi mo pa kayang patawarin, bigyan muna ng oras ang iyong sarili upang makapag-isip at makapagdesisyon ng maaayos.

7. Paghatian ang mga gawain at huwag mag-solo

Kung kayo ay mag-asawa na, dapat ay magkaroon kayo ng tamang hatian sa mga gawaing bahay. Pwedeng magsalitan kayo sa pag-aalaga ng bata o sa paghuhugas ng mga plato. Huwag solohin lahat dahil sa bandang huli, baka mawalan na kayo ng oras sa isa't isa.

8. Magbigay ng oras para sa isa't isa

Kawalan ng oras para sa isa't isa ang isa ring pinagmumulan ng away. Isipin mo na lang noong nagliligawan pa lang kayo ay halos ibigay mo lahat ang oras mo sa nililigawan mo, bakit ngayon ay hindi mo kayang gawin? Mag-iskedyul ng date o kaya naman ay bakasyon na makakatulong mawala ang inyong stress at mapatibay ang pagsasama. 

9. Maging tapat at pangalagaan ang tiwala ng isa't isa

Ang pinakaimportanteng pundasyon ng isang relasyon ay tiwala. Dahil kapag nasira ito, mahirap na itong ibalik dahil magkakaroon na ng lamat. Upang hindi masira ang tiwala sa isa't-isa, maging tapat sa iyong partner.