Anim na Benepisyo ng Malunggay Bukod sa Pamparami ng Gatas sa Isang Ina

Ang malunggay o Moringa oleifera ay isa sa mga gulay na madalas nang makikita na nakatanim sa paligid, kaya naman hindi na nakakasorpresa na tayong mga Pilipino ay isinasama ito sa iba’t-ibang lutuing bahay.

Sa sobrang pangkaraniwan nito, nabibili lamang ito sa murang halaga o kaya naman, maraming pagkakataon na pwede pa itong mahingi nang libre sa inyong kapitbahay. Lingid sa kaalaman ng iba, maliban pa sa epektibo ito sa pagpaparami ng gatas ng mga inang nagpapasuso ng kanilang mga anak, ito rin ay sagana sa sustansya at mga bitamina na lubhang makakatulong sa ating pangkalahatang kalusugan. 

Sa katunayan, nadiskubre na rin ito ng iba’t-ibang bansa at dahil sa dami ng mga benepisyong nakukuha rito, tinagurian na rin itong isang superfood. Kilala rin ito sa tawag na ben-oil tree, horseradish tree, drumstick tree o clarifier tree sa mga bansa sa kanluran.

Ano ang mga Benepisyo na Maaaring Makuha sa Malunggay?

Napakaraming magandang naidudulot ang paggamit sa halamang ito-- mula sa mga dahon nito hanggang sa ugat. Ilan lamang rito ay ang mga sumusunod:

1. Nakakatulong ito sa ating tiyan at metabolismo. Dahil ito ay natural na pangontra sa bacteria at fungi, epektibo ito upang maiwasan ang mga parasitiko at uod na pwedeng manirahan sa ating tiyan. Nakakapagpabilis rin ito ng ating metabolismo kaya mainam ito sa mga taong nais magbawas ng timbang.
2. Proteksyon ng ating puso, atay at mga bato (kidneys). Sa mga taong mahilig kumain ng mga pagkain na maalat, mataas sa kolesterol, at sitsirya, makakatulong ang malunggay upang magpababa ang kolesterol, at maialis ang mga lason sa ating katawan dulot ng mga pagkaing hindi masustansya. Dahil rito, maiiwasan natin ang mga s(a)kit sa puso, atay, bato at iba pa.
3. Suporta sa ating utak at kalusugan ng ating pag-iisip. Dahil mayaman ang gulay na ito sa vitamins E at C, nalalabanan nito ang tinatawag na oxidation at nape-preserba ang ating mga neurons pati na ang mga kemikal  natin sa utak na importante sa pagpapanatili ng memorya, pagbabago ng emosyon at ang natural na kabuoang kalusugan ng ating utak upang magawa nito ang mga tungkulin nito sa ating katawan.



4. Pang-iwas sa iba’t-ibang s(a)kit tulad ng diabetes at k(a)nser. Napatunayan nang mabisa ang malunggay sa pagpapanatili ng normal na blood sugar natin sa katawan at dahil ito ay sagana rin sa antioxidants, mas malaki ang tyansa nating makaiwas sa k(a)nser kung uugaliin ang pagkain nito lalo na kung sasamahan ng tamang pagkain at regular na pag-e-ehersisyo. Nagbibigay ginhawa rin ito sa s(a)kit ng ulo, s(a)kit ng katawan, lagnat, hika at iba pa.
5. Panlaban sa impeksyon at mabilis na paggaling ng mga sugat. Ang pinatuyong dahon ng malunggay na dinikdik upang maging pulbos ay mabisang panlunas sa mga simpleng impeksyon sa loob ng katawan tulad ng ubo at sipon. Pwede ring pakuluan ang dahon nito at gawing pantapal sa mga sugat upang mapabilis ang paggaling ng mga ito, gawa nang mataas na konsentrasyon ng vitamins A, C at E rito na siyang mabuti sa ating balat.
6. Lunas sa implamasyon. Kilala itong mabisang pampatibay ng ating proteksyon laban sa mga karamdaman, at isa ang implamasyon sa natural na paraan ng ating katawan upang labanan ang mga ito. Kaya lamang, sa katagalan, pwede itong mauwi sa mga komplikasyon kaya maiging pahupain ang implamasyon kalaunan at ito ay maaaring magawa ng malunggay. Epektibo rin itong panlunas sa pamamaga ng ating mga kasu-kasuan at litid.

Tunay ngang napakaraming gamit ng halamang ito at sa panahon ngayon, hindi na lamang ito sa pagkain maaaring makuha. Ang dahon nito ay matatagpuan na rin sa pormang tableta at nagsisilbing supplement na pwedeng inumin araw-araw. Kung mas nais naman ang mas natural na paraan ay maaaring ilaga ang mga dahon nito upang gawing tsa-a o kaya’y patuyuin at dikdikin para maging pulbos na maaaring idagdag sa tubig inumin o sa mga pagkain. Kung nais naman gamitin ang ugat, pwede itong dikdikin at ipahid sa balat, ngunit ito ay hindi pinapayong kainin.