Sampung Paraan Upang Mapanatili ang Normal na Level ng Ating Blood Pressure

Ang presyon ng dugo o blood pressure (BP) sa ingles, ay ang pwersa ng daloy ng dugo sa loob ng mga ugat. Isa ito sa mga unang kinukuha sa mga pasyenteng dumadalaw sa mga klinika dahil kapag ito ay hindi normal, maaaring indikasyon ito ng iba’t-ibang karamdaman. Ang normal na lebel nito sa mga taong nasa wastong edad ay 120/80 mmHg, ang alin mang pagtaas o pagbaba mula sa mga numero ito ay hindi maganda sa ating kalusugan. 

Ito ang ilan sa mga paraan upang mapanatili ang normal na blood pressure sa ating dugo:

1. Regular na pag-e-ehersisyo. Maiging sanayin ang katawan na may ehersisyo araw-araw kahit pa ito ay simpleng paglalakad lamang kada umaga nang kinse minutos. Hindi kinakailangan ang marubdob na pagpapapawis, ang mahalaga ay gawin ito nang hinay-hinay at matimtiman.
2. Huwag kalimutan ang mga gamot. Sa mga taong mayroong altapresyon at may minimintinang gamot, importanteng hindi sila lumiban sa pag-inom ng mga ito dahil maaari itong makaapekto sa kanilang kalagayan. Maglagay ng mga paalala upang ito ay hindi makalimutan.
3. Uminom ng tsaa. Sinasabing mas maraming benepisyo ang pag-inom ng tsaa kaysa kape lalo na sa mga may problema sa kanilang presyon ngunit dapat ay uminom lang ng tamang dami nito dahil hindi rin maganda ang labis-labis na pag-inom nito.
   
4. Kumain ng dark chocolates. Mas maigi kung pipiliing kumain na lamang ng dark chocolates kaysa sa ibang mga matatamis na pagkain dahil ito ay mayaman sa flavonoids na tumutulong upang hindi tumaas ang presyon ng isang tao. Mahahanap rin ito sa tsaa, wine, mga gulay at prutas.
5. Bawasan ang asin. Iwasan ang mga lubhang maaalat na pagkain at bawasan ang paggamit nito sa mga lutuin. Maaaring gumamit ng mas maraming paminta upang magdagdag ng lasa sa mga lutuin kaysa damihan ang asin.
6. Uminom ng orange juice sa umaga at gabi. Mataas ang prutas na ito sa potassium at vitamin C kaya epektibo itong magpababa ng presyon ng dugo. Mayaman din sa potassium ang saging at blueberry.
   
7. Obserbahan ang tulog. Ang taong humihilik at paputol-putol ang tulog ay pwedeng may kondisyong sleep apnea. Nangyayari ito kapag humihinto panandalian ang paghinga habang natutulog at karaniwan ay senyales ito ng taong may altapresyon.
8. Uminom ng karagdagang bitamina. Nakukuha ang mga bitamina at sustansya sa mga pagkain ngunit karaniwang hindi sapat kaya maaaring makakuha ng karagdagan nito sa mga tableta na pwedeng inumin araw-araw.
9. Kumain ng abokado. Sinasabing kailangan ng ating katawan ng 3500 mg na potassium araw-araw at ang abokado ang isa sa mga pinakamalaking pinagkukunan nito, higit pa sa ibang mga gulay at prutas kasama na ang saging.
10. Bumili ng sariling kagamitan na magagamit sa pagkuha ng BP. Mabuting magkaroong nito sa bahay dahil mas madali nating masusuri ang sarili nating katawan at sa ganitong paraan, mas malalaman natin kung ano ang mga bagay at pagkain na nakakapagpataas ng ating presyon na hindi na kinakailangan pang tumakbo sa mga klinika.