Ang labis na pagbigat ng timbang o obesity sa ingles ay makokonsiderang isang epidemya dahil masyado na itong talamak sa buong mundo at importante na masolusyonan ang problemang ito dahil hindi ito makakabuti sa ating kalusugan. Naiuugnay ito sa iba’t-ibang mga karamdaman kagaya ng altapresyon, pagtaas ng kolesterol sa katawan, stroke, diabetes, s(a)kit sa puso at bato, at pati na rin sa k(a)nser.
Ang balanseng diet at regular na pag-e-ehersisyo ay makakatulong para mapanatiling nasa tama ang ating timbang ngunit hindi lamang ito ang kinakailangang gawin, dapat rin nating itama ang mga gawaing nakasanayan na natin dahil maging ang mga ito ay may epekto sa ating pangangatawan.
Narito ang mga nakasanayan nating gawain sa umaga na nakakadagdag ng timbang:
1. Labis-labis na pagtulog
Ang bawat isa sa atin ay nangangailangan ng 7 hanggang 9 oras na pahinga upang maging maayos ang takbo ng ating sistema sa katawan at ano mang kakulangan o kalabisan ay hindi maganda sa ating kalusugan. Ang pagpupuyat lagi ay nakakapanghina at ang sobrang pagtulog naman ay nagreresulta sa pagkain nang labis-labis. Kaya naman, maigi na matulog ng maaga at gumising rin ng maaga araw-araw para mapanatiling maganda ang ating kondisyon.
2. Kakulangan sa tubig
Payo ng mga ekperto na dapat tayong uminom ng tubig pagkagising natin tuwing umaga bilang panimula ng ating araw. Makakatulong ito na mapanatili ang tamang temperatura ng ating katawan at sa pagbalanse ng ating nutrisyon. Maigi rin ito upang hindi masobrahan ang kain natin ng almusal. Kung nais magbawas ng timbang, maligamgam na tubig ang inumin tuwing umaga, pwede itong lagyan ng honey at lemon kung nais.
3. Hindi pagkain ng almusal
Importanteng makakain ng almusal lagi upang maibigay natin ang enerhiya na kinakailangan ng katawan sa pagsisimula ng ating araw. Mataas ang posibilidad na sikmurain tayo kapag masyadong mahaba ang oras na hinintay natin bago kumain at pwede itong mauwi sa gastritis. Ang pagliban rito ay nakakadagdag ng timbang dahil mapapasobra ang kain natin ng tanghalian at hapunan.
4. Maling pagkain sa almusal
Hindi lamang ang mismong pagkain ng almusal ang mahalaga kundi pati na rin kung ano ang kinukunsumo natin. Ang mga matatamis at junk foods gaya ng pancake, donut, at iba pa ay hindi maganda sa katawan. Mas maigi na simulan ang araw sa pagkain ng tama katulad ng mga prutas at gulay, cereals na mayaman sa fiber, oatmeal at green tea.
5. Hindi pag-e-ehersisyo
Sa umaga pinakamagandang magpapawis dahil nakakabuhay ito ng katawan at hindi rin kailangan na pumunta pa ng gym para rito dahil kahit ang simpleng paglalakad, jogging, pagbi-bisikleta o paglangoy ay sapat na.
Hindi nakakapagpaaraw
Paggising sa umaga ay magandang lumabas upang makasagap ng sinag ng araw. Nakakapagpabilis ito ng metabolismo kaya mainam ito sa mga nais magbawas ng timbang. Kahit 20 hanggang 30 minutos lang ay sapat na upang mas lalong gumanda ang kalagayan ng ating katawan at pati na ang pag-iisip.
Comments
Post a Comment